Այսօր Ani Plaza հյուրանոցում կայացավ Մանկական Եվրատեսիլի երկրորդ մամլո ասուլիսը: Եվրատեսիլի հայաստանյան պատվիրակության նախագահ Գոհար Գասպարյանը և Մրցույթի մամլո խոսնակ Արտակ Վարդանյանը բացահայտեցին երկար սպասված գաղտնիքները: Սակայն մինչ գաղտնիքներին անցնելը` նշենք, որ համերգը կայանալու է երկու օր: Առաջին օրը` դեկտեմբերի 2-ին, տեղի կունենա Գլխավոր փորձը` բացարձակապես նույն համերգը, սակայն առանց քվեարկության և հաղթողի: Իսկ եթե ցանկանում եք ներկա գտնվել քվեարկությանը և տեսնել հաղթողին բեմի վրա, ձեռք բերեք Մանկական Եվրատեսիլի` դեկտեմբերի 3-ին կայանալիք համերգի տոմսերը: Իսկ հիմա անցնենք ամենակարևոր գաղտնիքներին:
Գաղտնիք 1
Սա թերևս Մրցույթի ամենահայտնի և ամենաքննարկված գաղտնիքն էր: Ովքեր են լինելու այս տարվա Մանկական Եվրատեսիլի հաղորդավարները: Չնայած լայնորեն շրջանառվում էր Գարիկ Մարտիրոսյանի անունը, այսօր պարզ դարձավ, որ հաղորդավարների զույգը կկազմեն Եվրատեսիլի Հայաստանի պատվիրակության նախագահ Գոհար Գասպարյանը և հայտնի հաղորդավար և երգահան Ավետ Բարսեղյանը:
Գաղտնիք 2
Մանկական Եվրատեսիլի բեմում կերգեն ոչ միայն 13 երկրների ներկայացուցիչները, այլ նաև հայ երգիչները: Մամլո ասուլիսի ժամանակ նշվեցին մասնավորապես Սիրուշոյի և Մանկական Եվրատեսիլ 2010-ի հաղթող Վլադիմիր Արզումանյանի անունները:
Գաղտնիք 3
Առաջին անգամ Հայաստանում կկազմակերպվի է հրավառություն-ներկայացում: Այն, իհարկե, կլինի Մանկական Եվրատեսիլի շրջանակներում և կզարմացնի ոչ միայն հայերին այլև ամբողջ Եվրոպային:
Գաղտնիք 4
Ինչպես արդեն հայտնի է Եվրատեսիլի բոլոր երկրպագուներին, ամեն տարի հաղթողին շնորհվող մրցանակը յուրօրինակ դիզայն է ունենում: Այս տարի ևս բացառություն չէ: Այս տարվա Մանկական Եվրատեսիլի մրցանակի հեղինակը կլինի դիզայներ Նուռր:
Գաղտնիք 5
Այս տեղեկատվությունը գաղտնիք չէ, սակայն այն նոր է և այդ պատճառով մենք մեզ պարտավորված ենք համարում այն հայտնել ձեզ: Բոլոր այն լրագրողները, ովքեր արդեն հավատարմագրվել են, կամ պատրաստվում են հավատարմագրվել մոտակա մի քանի օրվա ընթացքում (հավատարմագրման վերջնաժամկետը հետաձգվել է) հնարավորություն կունենան ականատես լինել Մրցույթի փորձերին (առանց բեմական հագուստի):
Գաղտնիք 6
Այն գաղտնիքը, որին բոլորս անհամբեր սպասում էինք — ով է լինելու Մանկական Եվրատեսիլի` այս տարվա հյուրը — ցավոք, այդպես էլ չբացահայտվեց: Այն կլինի Մրցույթի մեխը և պարզ կդառնա միայն դեկտեմբերի 2-ին և 3-ին: Դե ինչ, մեզ մնում է միայն գուշակել . . .
Գաղտնիքների պաշարը դեռ սպառված չէ. առջևում մի հսկայական միջոցառում է` Մանկական Եվրատեսիլ 2011-ը, որն անկասկած կմատուցի շլացուցիչ շոու և գերազանց ժամանց:
