Անդրե. “Այս պահից սկսած պատասխանատվությանս զգացումն է՛լ ավելի մեծ է լինելու”

Սեպտեմբերի 21-ին երգիչ Անդրեն նախագահ Սերժ Սարգսյանի կողմից պարգևատրվեց Հայաստանի Հանրապետության վաստակավոր արտիստի կոչումով:

«Կարծում եմ` ցանկացած արտիստի համար սա ամենասպասված կոչումն է: Շատ ուրախ եմ, որ հենց այսօր` ՀՀ Անկախության 23-ամյակին, արժանացա այս բարձր գնահատականին»,-ասում է երգիչը:

Անդրեն նաև նշեց, որ անչափ հուզված է ու շնորհակալ բոլոր շնորհավորանքների համար. «Այս պահից սկսած պատասխանատվությանս զգացումն է՛լ ավելի մեծ է լինելու: Իհարկե, միշտ եմ մեծագույն պատասխանատվությամբ վերաբերվել իմ աշխատանքին, բայց այսօրվանից սկսած ավելի մեծ ոգևորությամբ եմ աշխատելու… սրանք միայն խոսքեր չեն»:

Հիշեցնենք, որ Անդրեն արդեն շուրջ 20 տարի է, ինչ բեմական գործունեություն է ծավալում: Այս ընթացքում երգիչը տարբեր մրցանակաբաշխությունների ժամանակ 13 անգամ արժանացել է «լավագույն երգչի» կոչմանը, թողարկել է 6 ձայնասկավառակ, պատվով ներկայացրել է Հայաստանը մի շարք մրցույթներում, ինչպես նաև, 2006 թ-ին դարձել է առաջին հայ երգիչը «Եվրատեսիլ» երգի մրցույթում:

«Իսկապես, շատ ուրախ եմ և շնորհակալ բոլոր մրցանակներիս և պարգևներիս համար, սակայն ՀՀ վաստակավոր արտիստի կոչումն ինձ համար ամենաբարձր գնահատականն է, իհարկե, հանդիսատեսի սիրուց և հարգանքից հետո»,-ասում է ՀՀ վաստակավոր արտիստ Անդրեն:

Andre Management Team

Advertisements